مقالات

جمال داود الهيتي

الغناء الفلكلوري هو الغناء الشعبي البريء الذي يؤدى بالمناسبات، وخاصة مناسبات الأفراح كالزواج والخطوبة وختان الأطفال وغيرها من المناسبات، ومدينة هيت من المدن التي تزخر بتراث شعبي ثر نظراً لعمقها التاريخي الذي يفضي عليها هذا الخزين الكبير من الغناء الفلكلوري الشعبي.
لقد كان الاحتفال بالزواج له مراسيم خاصة سأمر عليها مرورا سريعا، فعندما يعلن عن موعد الزواج يجتمع الشباب من أصدقاء العريس في بيته ويغنون ويرقصون ابتهاجا بيوم زفاف صديقهم وتستمر الاحتفالات لأكثر من يوم ويقام (اللعب) كما يحلوا لأهل المدينة تسميته وهنا يتجمع الشباب وينفرد أحدهم بالنقر على صفيحة معدنية (التنكة) بعد أن يضعوا قرب محل النقر على الصفيحة (سبحة ومجموعة من المفاتيح) كي يكون صوت الطرق أكثر عذوبة، ويقوم الآخرون بالغناء فينفرد أحدهم بقراءة السويحلي والأبوذية والموالات ثم يبدأ بالغناء. ومن الأغاني الشائعة حينها أغنية:
(الميج يابو الميج يابو الميجنه لتتعنه يا عشيري جين أنه)
وكلماتها تقول:
شايله بتيههَ وتملي مي حلو ويادموع العين رشكك يادلو ما كلتلك يايوم زوجيني الحلو والكبر ضيك وعيشه عزرنه الميج يابو الميج يابو الميجنه لتتعته ياعشيري جيت أنه
يا ظريف الطول ياسن الظحوك يالرابي بِدلال أمك وأبوك يوم لكشر يوم كالولي خذوك شعر راسي شاب والظهر أنحنه الميج يابو الميج يابو الميجنه لتتعنه ياعشيري جيت أنه
يا ريام الوارده مشمش وتين وصافه ذهوبه على خد اليمين جيبلي المصحف أحلف يمين ما يطب البيت غير أنتِ وأنا الميج يابو الميج يابو الميجنه
وتستمر الأغنية على هذه الشاكلة.
وهناك أغنية أخرى تغنى بها أبناء المدينة في احتفالاتهم وهي أغنية:
(ياعين موليتين وعين موليه... شكواي لا الله ولا بيد العبد شيّ)
وتقول:
ياعين موليتين وعين موليه شكواي لاالله ولا بيد العبد شيّ راحت تزور الخضر مارحت أنا وياهه ويكليب الكشر ولايصبر بلياهه تمنيت روحي كمر مدكوك بجلاها لولا هباري عجم ومشكفه بيهه ياعين موليتين وعين موليه ... شكواي لله ولا بيد العبد شيّ
راحت تزور الخضر كام الخضر يهتز عالابسات الهباري فوك ثوب الجز
ريت الحرمني عشير يينام نومه فز ويموت جنب وجنب والجفن عاريه ياعين موليتين وعين موليه ... شكواي لاالله ولا بيد العبد شيّ
ياعينها ياربع ياعين شاهينه ياعين حر وعلى الصيده مطلجينه الزلف لمن طفح بالج تردينه خلي مجلجل على رويعي الغنم فيه ياعين موليتين وعين موليه ... شكواي لا الله ولا بيد العبد شيّ
ومن الأغاني الفلكلورية التي يرددها الهيتيون أيضا أغنية (الميمر) وإليكم قسم منها:
عالميمر وعالميمر وعالميمر حاير أحب الحنج لوله المنحر
تشريني تشريني تشريني شبه لخيار الضاربه تشريني
بالله خذوني يمهه تشريني بلجن مليحي بين عيونه غزر
عالميمر وعالميمر وعالميمر حاير أحب الحنج لوله المنحر
مكرونه مكرونه مكرونه روحي وروحك بالسما مكرونه
ريتك بحفظ الكتب واليقرونه حفظ الخطيب الواكف أعلى المنبر
عالميمر وعل الميمر وعالميمر شن هالغزال العلى سميجه حدر
طلبت عليه عبد الي وعبد اله ممنون أجيب العبد الي وعبد اله
لوله الشرك كلت الكمر عبد اله حته الكمر لملم أنجومه وحدر
عالميمر وعل الميمر وعالميمر يا هله بجيتك يا حبيبي وأكثر

وكذلك أغنية: (شايل لوين تريد أنا يوحيد أمه بكلبي وكول بعيد أنا جاوين أظمه) وتقول كلماتها:
أنعل أبو الوَداج أنا للمي تشربين شلي الزلف لي فوك أنا لايندمر طين
شايل لوين تريد أنا يوحيد أمه بكلبي وكول بعيد أنا جاوين أظمه
يلي وكعت بالبير أنا ناوشني أصبعك لوما حجايه الناس أنا لنزل وطلعك
شايل لوين تريد أنا يوحيد أمه بكلبي وكول بعيد أنا جاوين أظمه
كم مرهَ كتلك جوز أنا لاتعض خدي خوفي الأثر ينشاف أنا ولا أنا ودي
شايل لوين تريد أنا يوحيد أمه بكلبي وكول بعيد أنا جاوين أظمه
بكليبي حفرُ بير أنا ودرجهَ مرمر يصلح دوهِ للعين أنا دمك يالأسمر
شايل لوين تريد أنا يوحيد أمه بكلبي وكول بعيد أنا جاوين أظمه
تتخطه بالبستان أنا شوفوا النجيبة سَوتْ شَخِط بالكاع أنا راسِ الكصيبة
شايل لوين تريد أنا يوحيد أمه بكلبي وكول بعيد أنا جاوين أظمه
وكذلك تردد أغاني على شكل منلوجات وخصوصاً في الأعراس ومنها:
أبحوشكم لفرش ونام أحنطوني حكي ... ويرد الجميع بالتمام
شفته وشفته ويا شفته عسل ينكط من شفته ردت بوسه من شفته ...
أبحوشكم لفرش ونام أنطوني حكي بالتمام ... أنطوني حكي بالتمام
شفته بعلاوي التمن حلوات يمه ألتمن هيتاوي وما يتأمن
أبيتكم بخله طويله ومبيه حيل الثوب أشيله وميه حيل الثوب أشيلة
شفته بدربونة الله يوكع وكله أصمله سمو الولد عبد الله
أبيت أبو النخلة زلك أتكيدي على معيضدك أياباه لينكسر
وفي زفة العريس بالتحديد تصدح حناجر بالهوسات ومنها:
صفر أخشاب أحنا تلوگ النه بالمختار أحنا الآمنه
وهذه المقاطع هي عباره عن قفل يردده الجميع، أما الرادود فيقول مثلا الآتي:
ومن الشباك ترابيني ........... ويرد عليه الجميع:
صفر خشاب أحنا تلوگ ألنه.
وتستمر كما يلي:
وعن ولفي تريد أتسليني........... صفر أخشاب أحنا تلوگ النه
ميت عالنص تخليني لا للنار ولا للجنه ..... صفر أخشاب أحنا تلوگ النه
لو هلهلتي ياعمتنا ........ صفر أخشاب أحنا تلوگ النه
وأحنا الصبيان بلمتنا ...... صفر أخشاب أحنا تلوگ النه
نزحف عل الموت ونتعنه ونسح كراس الميطيعنه ... صفر أخشاب أحنا تلوگ النه
ويرافق هذه الهوسات والأهازيج حركات قفز وتلويح بالأيدي.
ومن أغاني النساء أغنية (بالمالية) وتقول كلماتها:
بالماليه ياناس بالماليه عروسك أزغيره والدرج عاليه جبنالك أياها بزخيخ المطر وتبلل الأطلس على الغاليه بالماليه ياناس بالماليه عروسك أزغيره والدرج عاليه من مثلنا ياناس من مثلنا وأحنه نزوج بنتنا لأبننا وأحنا نكود الخيل برسانها لِعند أبو محمد ديذبح لنا بالماليه ياناس بالماليه عروسك أزغيره والدرج عاليه كومي أنزلي ياحديثه كوم أنزلي جتك أحمول الشام أستعجلي والله ماأستعجل ولا أنزلي ألا تجي الدوده من الصايغي بالماليه ياناس بالماليه عروسك أزغيره والدرج عاليه
ومن أغاني النساء أيضا أغنية (يدريول السيارة) وتقول كلماتها:
يَدريول ِالسيارة خيّ وين أهواي عمي وبن عمي حَدرو يِصلون
خي وين أهواي يدريول السيارة خي وين أهواي
يالرايح البغداد صوغهَ أشجبتلي خي وين أهواي يدريول السيارة خي وين أهواي
مَلازم الحَلقهَ دكمهَ البدلتي خي وين أهواي يدريول السيارة خي وين أهواي يالواكفْ علهَ الباب روح الهلك روح خي وين أهواي يدريول السيارة خي وين أهواي
لا تشتري ولا تبيع بسْ تمردْ الروح خي وين أهواي يدريول السيارة خي وين أهواي
من فوكِ سبعِ أسطوح ذِبلي جِكارهِ خي وين أهواي يدريول السيارة خي وين أهواي
مو لازم الكبريت من خدههَ نارهَ خي وين أهواي يدريول السيارة خي وين أهواي
ثاري البنات أشكال مثلِ الجفايفْ خي وين أهواي يدريول السيارة خي وين أهواي
بيهن تخون بساع وبيهن تِوافي خي وين أهواي